【英超】撻着咗冇得擋!夏蘭特已經隱形 曼城作客照炒富咸4:0;周中作客熱刺定江山

曼城向史無前例4連霸,又走近一步。周六英超早場,藍月亮憑加度華爾變身帶刀侍衛梅開二度,作客以4:0大炒富咸,暫時升上榜首,肯定粉碎利物浦冠軍夢,跟住輪到阿仙奴。

曼城目前36戰85分,餘下兩仗分別係周三凌晨補賽作客熱刺,以及下周日煞科日主場對韋斯咸。阿仙奴36戰83分,除周日作客曼聯,煞科日主場會對愛華頓。利物浦原本只剩數字上機會,隨住曼城勝出,高普必將以聯賽第3告別紅軍。

曼城繼續以上仗食出大四喜嘅賀蘭特掛帥,配合奇雲迪布尼、科頓、貝拿度施華攻堅。富咸鋒線有3名巴西兵蒙尼斯、韋利安、入選美洲盃大軍嘅安達斯彭利拿,正選平均年齡達28歲316日,創今季英超最年長紀錄。

曼城完全控制戰局,12分鐘,迪布尼助攻,克羅地亞國腳加度華爾推橫,避過富咸守將後射入;38分鐘幾乎拉開比數,迪布尼傳中省中人,夏蘭特門前錯失黃金機會,曼城半場只領先1:0。

59分鐘,今仗極有威脅嘅貝拿度施華,扭過安東尼羅賓遜後被包連夏鏟跌,科頓把握機會第一時間射入,曼城領先2:0。71分鐘,又係貝拿度施華傳入禁區,加度華爾遠柱接應射入,擴大優勢至3球。補時6分鐘,伊沙迪奧普踢中祖利安艾華利斯,領紅牌兼失12碼,艾華利斯主射得手,曼城大炒富咸4:0。