今季英超曲終人散，轉會消息開始通天飛，當中已經官宣普捷天奴執教嘅車路士，買人傳聞不絕於耳，反而一向最「旺場」嘅「傳曼聯」，到目前為止都算幾靜，傳得最似樣嘅都係卡尼、金玫哉同蒙特三個。
其實都無可厚非，始終曼聯嚟緊仲有場足總盃決賽，等完埋先再放風都絕對可以理解。
不過領隊坦哈格日前接受《泰晤士報》專訪，就忍唔住爆響口，話迪基亞同麥佳亞即使留低，嚟緊都未必有正選：「我相信迪基亞會留低，但我唔會保證佢永遠都會係我哋嘅一號門將。」
至於麥隊，坦哈格就更坦白：「佢依家嘅情況，應該冇人會覺得開心，其實我滿意佢嘅表現，但留隊與否，除咗係我，亦係佢自己嘅決定。」
被問到前鋒問題，坦哈格亦有強烈暗示：「拉舒福特嘅入球責任，需要有多一個人去分擔。格連活特早就已經證明，佢係有能力做得到，佢係一位可靠嘅曼聯前鋒。」不過，坦克亦都補充，格連活特能否重返球隊，唔係由佢話事。
格連活特係曼聯青訓產品，至今130場入36球，係英格蘭國家隊嘅明日之星。可惜呢位天才球員去年1月被警方控告涉嫌強姦、傷人同控制他人等罪，雖然今年2月已獲撤控，但已聲名狼藉，嚟緊可唔可以復出，贊助商似乎係當中最關鍵嘅角色。
