出得嚟行，預咗要還？曼聯周四凌晨英超，麥湯米尼禁區被侵犯，得唔到12碼之後，補時更被水晶宮追和1:1，9連勝慘告繼䌫。
依家曼聯落後榜首阿仙奴8分，兼且踢多1場，更大鑊係中場核心卡斯米路今仗攞黃牌，下周一凌晨作客阿仙奴要停賽，大大影響爭勝實力。
荷蘭前鋒韋格賀斯，剛加盟即正選登場，曼聯作客亦稍為佔優，雖然41分鐘幾乎先失，畀水晶宮嘅奧辛尼艾度亞迪射中楣，但兩分鐘後藉艾歷臣、般奴費南迪斯一次美妙配合，後者射門破網，曼聯半場領先1:0。
之後戰情膠著，70分鐘開始，曼聯步入黑暗期，先有卡斯米路攞黃牌，兩分鐘後出現爭議場面，麥湯米尼殺入禁區，已經擺脫基斯李察士，後者出腳攔截，掂唔到波而令麥湯跌低，球證冇畀12碼，曼聯球員激烈抗議，但VAR審查後，仍維持球證判決。
曼聯失去擴大領先優勢機會，去到補返時1分鐘，更被水晶宮嘅米高奧利斯，藉罰球直射破網，追和1:1完場。
曼聯上仗對曼城，藉一個問題球扳平，然後再反勝，球迷高呼4424陣式又再出現，不過今仗4424消失不特止，紅魔反而係VAR爭議下輸蝕嘅一方，世事都真係幾奇妙。
