「扭波王」入世界波！周日英超聯賽，紐卡素作客1:1迫和狼隊，辛特麥斯明90分鐘射入精彩世界波，令喜鵲保持開季4場不敗。
狼隊上仗雖然0:1僅負熱刺，但表現非常出色，全場力壓對手，輸波欠運，今仗三中場摩天奴、魯賓尼維斯、馬菲奧斯紐尼斯繼續有水準，並由魯賓尼維斯38分鐘開紀錄，以為有機會打開勝利之門，之後仲有球波被VAR推翻，結果完場前被扳平，仍然未開齋。
紐卡素上仗同曼城打和，被捧到上天，對住狼隊，發揮反而冇咁順暢，特別辛特麥斯明被狼隊重點防範，雖然威脅力仍極大，但就唔似得上場咁，話過就過。
幸依家嘅紐卡素，真係有心有力，末段狂攻令狼隊開始潰散，終於90分鐘扳平。當時黃喜燦回防解圍，但個波落番喺禁區前；9樓咁高冇所謂，辛特麥斯明仍然可以球不著地，射出一個鬼咁靚嘅窩利，為紐卡素扳平。
除咗高速過人，仲入埋世界波，辛特麥斯明無疑係英超季初最閃嘅球星之一，唔少球迷都呼籲，法國隊要預埋佢踢世界盃決賽周。但佢完場前疑似有少少拉傷大腿肌肉，如果要養傷，對紐卡素會有好大影響，特別周四凌晨快車，佢哋仲要作客對利物浦添！
