又一場英超好波！紐卡素先失守，之後連入3粒，最終被曼城逼和3:3。扭波王辛特麥斯明堅爆，奇雲迪布尼亦展示傳球大師絕學，令呢場「油王打吡」好睇到極。
今仗係中東石油富豪較量，沙地阿拉伯財團上季中收購紐卡素，長遠目標當然係追上曼城，成為英超以至歐洲班霸。雖然大把錢駛，但紐卡素冇亂駛錢，寧願搵多幾個實用球員，冇走大牌路線。
開波初段，紐卡素踢落縛手縛腳，被㩒住嚟砌，5分鐘已經失守，根度簡大範圍長傳交貝拿度施華，再走入禁區接應射門，兩個頂級中場，為曼城簡單搞掂1:0。之後藍月亮攻勢仍然猛烈，紐卡素藉門將尼克普比幾次撲救，未致多失。
保住只落後一粒，紐卡素球員回魂，打番猛烈逼搶、分邊快攻戰術，攞番晒優勢，特別係扭波王辛特麥斯明，喺左路癲到暈，完全當基爾獲加冇到，真正一個打晒；28同39分鐘送出兩個靚助攻，造就拍檔米基爾阿米朗、哥林威爾遜入波，主隊上半場反先2:1。
54分鐘紐卡素再入波，艾寧夏蘭特射中柱後，辛度麥斯明又踩行turbo，逢人過人，曼城後衛禁區外侷住踢低佢，自由球專家捷比亞射成3:1。
紐卡素連谷3球，體力稍下降，又輪到曼城反攻，奇雲迪布尼再駛出傳球大師魔法，60分鐘吊放遠處造成混戰，艾寧夏蘭特近門射入；4分鐘後，大師送出手術刀式直線，劏開對手防線，由貝拿度施華插上射入，又係高質素入球。
捷比亞其後攔截奇雲迪布尼，球證開頭直接畀紅牌，但睇過VAR又改出黃牌，紐卡素逃過一刧，最終兩軍打和3:3。由上季次循環作客被曼城大炒5:0，到今仗均勢打和，紐卡素無疑全面升呢，上咗另一層次。
曼城和波後，今季3戰全勝球隊只剩阿仙奴1隊，而曼聯未對利物浦前，暫時得韋斯咸3戰全敗，佢哋主場又以0:2輸畀白禮頓。
