手套球王大翻身！馬列斯領導曼城絕地反擊，收服落後落兩球劣勢，下半場連入4球，主場4:2反勝熱刺，繼續追趕阿仙奴。
講翻身真係冇錯，馬列斯季初表現欠佳，經常敗家，甚至有聲音要求哥迪奧拿將佢出售。不過經世界盃休戰後，呢位阿爾及利亞國腳大踢爭氣波，上個月上陣3場，射入1球及1次助攻，被球迷票選為12月曼城最佳球員。踏入新一年，馬列斯佳態持續，為曼城帶來爭標路上，一場極為重要嘅逆轉勝。
哥迪奧拿今仗又玩嘢，兩大中場主力奇雲迪布尼、貝拿度施華都做後備，反而出齊艾寧夏蘭特、祖利安艾華利斯、基亞利殊、馬列斯4個攻擊球員。
雖然仍控制戰局，但44、45分鐘連環失守，艾達臣摩拉斯派膠，畀古路施夫斯基搞掂，之後卡尼靠鬥志撈番個波、艾馬臣艾巴里斯杜攻破大門，曼城上半場竟然落後0:2。
但熱刺防線畢竟廢廢哋，頂唔住曼城大反攻，祖利安艾華利斯51分鐘先扳回一球，兩分鐘後馬列斯助攻，艾寧夏蘭特頭槌破網追和。
馬列斯63分鐘自己嚟料，窄位射入反超前，到90分鐘又把握基文迪朗格勒失誤，單刀射成4:2完場，完成大逆轉。効力曼城以來，馬列斯對熱剌已累計射入7球，兼有4次助攻，係熱剌真正尅星。
結束兩連敗劣勢後，曼城18戰39分，落後榜首阿仙奴5分但踢多場，周日晚主場對狼隊，有望喺阿仙奴大戰曼聯前，進一步拉近距離，畀壓力兵工廠。
4日之內，熱刺連負阿仙奴、曼城，仍落後第4位紐卡素5分，兼且多踢1場。如果下周二凌晨作客不敵富咸，連第5位都會被富咸取代。面對後防持續不穩，孫興民依然災難級演出，李察利臣繼續冇辦法取得入球，干地冇乜本錢可以扭轉劣勢。
