周二凌晨英超聯賽，諾定咸森林雖然先開紀錄，但畀老將艾殊利楊格扳平，結果主場1:1和阿士東維拉。雖然戰績低落，但森林賽前仍同領隊史提芬谷巴續約至2025年，咁嘅筍工去邊度搵？
續約之後，谷巴即刻進行改動，將連格眨為後備。連格由曼聯來投後一直冇料到，一球都未入過，谷巴終於頂佢唔順。另一前鋒艾曼紐丹尼斯，反而有個人突破，15分鐘頭槌破網，取得加盟後首個入球，主隊領先1:0。
維拉22分鐘扳平，艾舒利楊格已37歲，仍然係正選左閘，唔止防守，仲有助攻，禁區邊射入靚波，為球隊追和1:1。
下半場維拉仍較為主動，但攻勢冇威脅，森林亦以防守為主，樂意維持1:1賽果，結果如願以償終止5連敗，9戰5分排倒數第2，以1分領先包尾李斯特城。
對維拉之前，森林打咗8場英超，只得1勝1和6負，同李斯特城並列榜尾。呢個成績，對從事航運業嘅班主馬連拿基斯嚟講，當然非常失望。因為相隔多年重返英超後，今個暑假佢狂掟1.4億鎊，簽入23個新球員，當中更大部分係國腳級人馬，但只換來差勁成績。
谷巴雖然帶領升班有功，但作為主帥，森林季初表現差，實在責無旁貸。正當外界同博彩公司估計森林必炒谷巴時，領導層賽前突然宣布，雙方續約至2025年，真係估佢唔到。
谷巴未教森林前，只做過史雲斯主帥，再早啲嘅係英格蘭U16、U17教練。佢當然有難處，23個新球員，聽落好疊馬，其實係拉雜成軍，有排未培養到默契，效果必定衰過用番升班主力。谷巴賽前訴苦：「成班球員只係互相認識一個月，合作上存在問題，需要時間融入。」
