「晏菲路最美好一夜，我以最差勁嘅方式結束。夢想於最後一刻破滅了！」利物浦主場1:0擊敗曼城，重振軍心，球員瘋狂奔跑，踢出今季代表作。但其中一個跑動最多嘅球員，卻換來傷感結局。迪亞高祖達受重創，將缺席下月世界盃決賽周。
臨完場，祖達提腿想爭波嗰陣，突然面容扭曲，㩒住右腳面容痛苦，軍醫治理後，要由擔架抬離場，當時已有不祥預感。
領隊高普公怖傷勢：「祖達小腿肌肉傷勢嚴重，將缺席今屆世界盃。雖然唔駛做手術，但係仍然需休戰一段長時間。實際時間未肯定，應該要幾個月，對佢、利物浦同葡萄牙嚟講都係壞消息。祖達非常堅強，情緒冇受影響。」
點堅強都好，世界盃先嚟受傷，確實痛上加痛。祖達係葡萄牙必然正選正鋒、C朗首席拍檔，為國家隊上陣29次，已射入10球。過去一個月，葡萄牙之前已有柏度尼圖、拉菲施華退隊，現時加上祖達，前線調動大受影響。一般估計，AC米蘭年輕前鋒拉菲爾利亞奧將被委以重任，同C朗、祖奧菲歷斯拍檔。
對於利物浦，打擊更加係即時性，繼路爾斯戴亞斯，再失一個主力前鋒。三前鋒陣式，依家剩番沙拿、法明奴、達雲紐尼斯，法比奧卡華路勉強都可以。被彈為超級水貨嘅達雲紐尼斯，之前主要做後備，依家要接受最全面考驗，只能夠講，祝佢好運。機會擺喺面前，可唔可以扭轉外界負面評價，睇佢自己造化。
祖達25歲，仲可以踢下屆世界盃，但佢上季亦曾經因傷，缺席一大段時間，都屬於腳患馬。如果未來足球生涯，都要經常同傷患戰鬥，將會非常可惜，射得又傳得，配合度超高，鬥志100分，的確係一位難得全面嘅鋒將。
