新帥效應幾時都有，但今次真係核彈級爆發。戴治首度執教愛華頓，即於主場爆大冷，以1比0打敗榜首球隊阿仙奴，叫前任林柏特情何以堪？
開波前，愛華頓排倒數第二，上次贏波已經係上年10月嘅事，最終林柏特孭大鑊被炒。前般尼主帥戴治上場，首仗即對阿仙奴，加上連主力鋒將安東尼哥頓都賣埋畀紐卡素，冇人諗過新帥效應可以拎晒3分！但愛華頓球員今場真係勁搏命，人人多走一步，信心極強，藉阿仙奴走樣，爆冷賽果就此誕生。
阿仙奴上次聯賽輸波，係去年9月4號作客曼聯，之後13戰不敗，當中只有兩場和波，奠定榜首地位。今次於護級球隊身上全失3分，同次席曼城同為20戰，阿仙奴領先5分，2月16號（周四凌晨）兩隊碰頭，無疑係爭標關鍵之戰。
阿仙奴全場有近七成控球率，但整體發揮唔對辦，面對對手緊逼反擊戰術，上半場射門次數比愛華頓更少。
冬季轉會窗死線前，阿仙奴從車路士買入佐真奴，但八字唔多夾，呢位意大利中場首披兵工廠戰衣，59分鐘後備上陣，1分鐘後即因角球落後，愛華頓中堅達高斯基頭槌頂成1比0。雖然呢球係唔多關佢事，不過就真係咁蹺。
阿仙奴之後大反攻，但布卡約沙卡、尼基迪亞等攻擊手，狀態不及之前勇鋭，加比爾馬天尼利被換走，杜沙特較有威脅，但愛華頓3大黑又硬中場奧拿拿、杜哥利同古耶喪跑，好似踢多個咁，最終戴治以戰術制勝，為愛華頓取得今季第4場勝仗，而阿仙奴最怕硬淨、體力型球隊嘅弱點，完全表露無遺，嚟緊預期會有唔少球隊參考戴治戰法，阿迪達真係要諗諗計喇。
