白禮頓今季表現超好，下季仲肯定有得參加歐洲賽，真係要寫個服字。除咗話意籍領隊迪薩比調度得宜之外，陣中唔少球員都好有質素，其中只得18歲嘅前鋒艾雲費格遜，多間英超球隊都有興趣收購，包括曼聯以及熱刺。
愛爾蘭國腳艾雲費格遜，佢阿爸就係巴利費格遜。艾雲仔細細個就效力愛爾蘭球隊波希米恩，14歲曾代表球隊與車路士踢過友賽，車仔球探更將佢加入觀測名單。去到16歲，艾雲費格遜曾經去到曼聯試腳，但「紅魔鬼」認為佢嘅質素一般，所以無跟進行動。
曼聯睇唔上眼，但白禮頓就覺得艾雲費格遜幾正，本身有1米88，夠「件頭」得嚟又幾靈活，所以2021年1月就簽佢做青年軍，好快就升上一隊。去到今季艾雲費格遜繼續有亮麗演出，連同盃賽及聯賽，已經為白禮頓取得10個入球。
艾雲費格遜進步神速，所以球隊4月就同佢簽份新合約，為期去到2028年。即係話呢段時間有人想撬佢過檔就要付出轉會費。
最近傳得最「行」嘅就係熱刺，基於前鋒哈利卡尼好大機會離隊，熱刺想搵個有潛質嘅去做補替，而艾雲費格遜就成為目標人選，希望用5000萬鎊將佢收購。
另外，曼聯成日都話想買前鋒，好自然會同艾雲費格遜扯上關係。尤其艾雲費格遜細細個就係曼聯粉絲，又去過曼聯試腳，相信要打動艾雲費格遜會比較容易。至於係咪加盟大球隊，都要問過白禮禮主席東尼保瑪，佢話艾雲費格遜未見底，仲有大把上升空間。
