Here We go！危城告急，成績差到爆，老細肯揼水，咪買人囉！車路士已同馬德里體育會達成協議，用「天價」借用葡萄牙前鋒祖奧菲臘斯半季，咁都未夠，《The Athletic》指，車仔希望斟多個前鋒，目標係杜林囝囝馬古斯，或者PSV嘅英格蘭小將馬杜基。
Fabrizio Romano指，馬體會同意降低外借費用後，車路士成功擊敗曼聯同阿仙奴，條件除1,000萬鎊外借費用，連埋人工、稅項等開支，車路士借用半季開支約1600萬鎊。
唔止咁喎，呢個合約更唔包含買斷條款，如果車路士季尾想買斷祖奧菲歷斯，就要再傾過條件，呢個刁咁著數，馬體會梗係一口答應啦。
借用半季，就要掟1600萬鎊，莫非祖奧菲歷斯曉飛？但冇計喇，足總盃吞曼城4蛋之後，車仔擁躉忍無可忍，高呼：「我哋要番阿布同杜曹！」現任老細、美國富商保利面對尷尬局面，目前唯一方法，只有繼續揼水增兵，又或者係再換領隊……
祖奧菲歷斯得23歲，速度及入球能力俱備，但同馬體會教練施蒙尼有心病，而且始終同球隊踢法格格不入，未能達到1.13億鎊轉會費嘅期望。為免佢越踢越沉而身價下跌，馬體會希望藉今次借用，祖奧菲歷斯可以喺英超省番靚個招牌。
菲歷斯目前已飛咗去倫敦接受體測，車仔亦乘勢食住上，希望斟多一位鋒將，《The Athletic 》指，車仔首選係慕遜加柏嘅法國國腳馬古斯杜林，由於杜林仔份約喺今夏就完結，如果車仔出手，轉會費未必會太貴。次選則係PSV嘅20歲小將馬杜基。
