【英超】後防穿大窿!般奴入兩粒 曼聯2:2逼和般茅 創45年來最曳紀錄

曼聯又失分!紅魔今晨作客憑隊長般奴梅開二度救駕,作客2:2逼和般尼茅夫,雖然叫執番1分,但錯失咗升上第6位嘅機會。

目前英超聯賽榜,前3爭標,第4嘅維拉32戰60分,聽晚對阿仙奴;第5熱刺同樣60分,第6紐卡素則有50分,而曼聯都係50分,因輸得失球而排第7。

曼聯今場用4231陣式,奧拿拿繼續把守大門,由於華拉尼、伊雲斯、利辛度馬天尼斯同連迪洛夫傷晒,中堅焗用小將甘華拿拍麥佳亞,左右二閘雲比沙卡、達洛治,中場掃蕩有明奈同卡斯美路,隊長般奴、拉舒福特同加拿祖支援前鋒海倫。

般尼茅夫已經上岸,歐戰資格冇行,基本上係風流波狀態,另邊廂曼聯仍要爭取更高排名出戰歐洲賽,但踢落般茅鬥志比曼聯更強,完全唔似等收工。

上半場般茅攻勢較多,16分鐘,加拿祖喺中場控波甩拖,畀般茅前鋒蘇蘭基拎到個波後長驅直進,負責Mark佢嘅甘華拿又跣腳,蘇蘭基攞死角入網,曼聯又要打逆境波。

般茅唔肯放生曼聯,繼續進攻,左閘卻基斯殺到入禁區起腳,好彩奧拿拿封到,之後施仙達拿又施射,僅僅斜出。30分鐘,曼聯反擊,個波去到般茅禁區彈來彈去,最終般奴把握機會狂抽追平1:1,連續3場有波入。

開心咗大概5分鐘,又係甘華拿個位,祖斯甸古華特無遮無掩下起腳得手,同第一球幾乎一樣,般茅再次領先。完半場前般茅幾乎拉開比數,阿當史密夫右路傳中,卻基斯頂中楣,之後古華特無人看管下施射,又過唔到奧拿拿,般奴亦有球百步穿楊中楣,半場般茅贏2:1返更衣室。

換邊後曼聯換入阿密特迪亞路,表現仍然冇乜起色,雙方一直膠著,去到63分鐘,明奈禁區外放冷箭,個波省中阿當史密夫隻手,曼聯獲得12碼,般奴主射得手,2:2再次扳平,完場前般茅獲得12碼,不過VAR檢查後指個波係喺禁區外,最終雙方以2:2完場。

般奴今場個人梅開二度,自2020年1月加盟以來,喺英超貢獻52個入球及39次助攻,直接參與曼聯91個聯賽士哥,比起同期拉舒福特創造42球,多出接近50球。不過,曼聯今季32輪失49球,係1978/79賽季後最多。

至於另一支曼市球隊曼城,喺較早時間上演嘅比賽,以5:1大炒盧頓,夏蘭特、杜高、高華錫及加華度爾分別建功,另一球係橋岡大樹擺烏龍。