後防發波瘟，開賽4分鐘內先失兩球，好在有般奴費南迪斯！葡萄牙國腳再顯頂級攻擊中場表現，帶領曼聯連追3球，周六英超聯賽3:2反勝森林。
新加盟嘅曼治，開季兩仗表現差，上仗吞熱刺兩蛋，更令領隊坦哈格被鬧到飛起。今場曼治養傷，坦克出番卡斯米路、艾歷臣鎮守中場，般奴費南迪斯、安東尼支援馬迪爾，差不多係上季最佳陣容，以為可以輕易食硬森林，點知唔係嗰回事。
今次唔關麥佳亞事，中堅出利辛度馬天尼斯、華拉尼，依然瞌眼瞓，開波只有4分鐘，已經落後0:2。
森林兩分鐘打反擊，前鋒阿旺尼長驅直進，如入無人之境，單刀射成1:0。兩分鐘後，森林右路開罰球，冇曼聯球員同韋利保利爭頂，畀佢輕鬆頂入，龍門奧拿拿冇反應。
開波4分鐘輸兩粒，曼聯先至瞓醒，開始組織反攻，但單箭頭馬迪爾狀態麻麻，對森林防線缺少衝擊力。入波仲係靠中場，拉舒福特17分鐘左路傳中，艾歷臣入楔時間一流，近門撞射入網，曼聯追近1:2。
下半場曼聯繼續大反攻，主角係般奴，冇咗曼治，葡萄牙國腳徹底解放，做番進攻自由人，52分鐘右路開出自由球，再入楔禁區，頭槌回傳中路，卡斯米路近門撞入，以一個非常有創意嘅攻勢追和2:2。
更關鍵係67分鐘，般奴後上接應呈單刀之勢，森林中堅禁區邊將佢拉跌，被罰出場。曼聯打多個下，76分鐘拉舒福特再搏到12碼，般奴主射入網，曼聯連追3球，主場3:2反勝森林，開季2勝1和，下周日作客對阿仙奴。
