英超始終咁好睇！開鑼第二仗已幾乎爆大冷，今晚早場富咸主場兩度領先，最終被利物浦追和2:2。兩隊中鋒阿歷山大米祖域、達雲紐尼斯都獻出頂級表現，抵讚到極點。
利物浦基本用番社區盾贏曼城套陣容，正選前鋒係沙拿、法明奴、路爾斯戴亞斯，但上半場畀富咸吓吓頂住，完全冇啖好食。
近年做升降機嘅富咸，相隔只有一季，又以英冠冠軍姿態重返英超，仲要開鑼即對利記，班球員瘋狂奔跑，頭15分鐘，利物浦連過半場機會都不多。
除咗防守緊密，富咸攻勢夠快又直接，特別係兩邊落底傳中，32分鐘，正正係堅尼泰迪落底傳中，上季狂入43球嘅塞爾維亞中鋒阿歷山大米祖域，遠柱力壓另一個阿歷山大、利物浦右後衛阿諾特，以頭槌為富咸攻入重返英超第一球。
利物浦上半場銳利程度唔及富咸，沙拿、法明奴靜過鬼，只有曾射中柱嘅路爾斯戴亞斯有威脅。高普見勢色唔對，下半場5分鐘已換入達雲紐尼斯、哈維艾利洛，換出法明奴、艾簡達拿，用兩個後生仔增強速度同對抗力；中場唔夠硬，出埋老大哥占士米拿頂行佢。
逃過基巴奴射中柱一刧後，㩒掣行動開始見效，64分鐘，沙拿右路傳中，達雲紐尼斯門前巧妙用後腳射門破網。利物浦扳平氣勢大盛，展開圍攻，眼見有望反敗為勝，又遇上阿歷山大米祖域。呢位中鋒唔只頭槌勁，仲有腳下功夫，帶波入禁區危險位置，連VVD都畀佢玩起，出腳攔截中人唔中波輸12碼，阿歷山大米祖域親自主射，富咸72分鐘又領先2:1。
82分鐘，利物浦又扳平，又關達雲紐尼斯事，佢接應中場直傳，突破富咸中路防線，雖然控球稍稍甩腳，反而啱晒同時殺上嘅沙拿，近門順勢射入。佐敦軒達臣補時射中楣，雙方2:2打和完場。
利物浦開鑼戰即失分，計埋社區盾表現，今季睇嚟要重用達雲紐尼斯、艾利洛等年輕球員。富咸憑戰意同良好狀態拉近戰力差距，特別係阿歷山大米祖域，大熟大勇又全面，今季英超表現值得期待。
