《無間道2》其中一場，韓琛唔想將對手滅門，但佢個拍檔話：「阿琛，做大事係要狠㗎！」咁喺英超爭逐係咪要夠狠夠辣？熱刺領隊干地一定話係，大嗱嗱6000萬鎊買巴西前鋒李察利臣，其中一個目的，就係要加狠加辣。
摩連奴任教時，曾話過熱剌球員太好人（見仁見智啦吓），唔夠狠辣硬淨，只有丹麥中場賀積查治最有血性，唔加辣，就好難超越曼城、利物浦。依家嘅干地比摩佬更狂更辣，新季當然要啪番兩粒偉哥，李察利臣確實係適當人選。
過去兩季喺愛華頓，李察利臣已確立鮮明型象，全能型中鋒，最重要血性超強，敢於抗衡、非常火爆。上季場內場外都咁精彩，唔單止同對手，甚至同隊友都開過拖，亦試過同加歷查等名宿駡戰，火花四濺。
呢種撩事鬥非嘅性格，干地固然鍾意，熱刺球迷更加收晒貨，皆因佢轉會後，喺IG貼佢喺19/20球季，代表愛華頓對阿仙奴嘅相，相中施巴路斯受傷倒地，李察利臣冇理佢，而係同比利連互睥、準備開拖。
李察利臣呢條世界仔貼呢張相，表明心跡為新球隊爆廠，搞到熱刺球迷熱血沸騰，紛紛畀like，歡迎球隊「新英雄」。
熱刺新季鋒線真係超豪華，絕對唔輸畀曼城、利物浦、車路士，哈利卡尼加孫興民已冇得彈，依家有埋李察利臣，啲嗱渣嘢交畀佢負責，表面睇都幾完美嘅！
