'

【英超】尼基迪亞入兩球兼絕殺!阿仙奴3:2挫曼聯 創隊史一項最佳成績

90分鐘一個VAR判決,有可能決定今季冠軍誰屬?阿仙奴憑尼基迪亞絕殺,主場3:2擊敗曼聯,創球會史上前半季最佳成績,進一步增加奪標機會。

打咗19場,阿仙奴50分居榜首,比曼城多5分,兼少踢1場;曼聯今輪落敗,紐卡素打和水晶宮,都已落後11分之多。

16勝2和1負,締造兵工廠史上最佳前半季戰績,暫時唯一敗仗,正係作客1:3不敵曼聯。今次雖然復仇成功,但過程非常辛苦,開波17分鐘,已被拉舒福特禁區外放冷箭得手,落後0:1。

一次左路流暢配合,格列沙加傳中,尼基亞迪後柱攝前頂波,24分鐘追和;布卡約沙卡今場弗爆,53分鐘射入世界波,令阿仙奴反超前,但6分鐘後,利辛度馬天尼斯助攻,藉角球攻勢為曼聯扳平2:2。

阿仙奴之後展開圍攻,比利時攻擊中場李安度杜沙特,剛由白禮頓轉會,尾段亦受命登場;睇住布卡約沙卡勁射中楣,尼基迪亞近門狂抽亦畀迪基亞神救,仲唔係和波收場?

最戲劇化場面90分鐘出現,尼基迪亞門前怪腳射入,但佢同辛真高都有越位嫌疑,要VAR裁決。等待結果時間好緊張,因為呢球入同唔入,積分一來一回,同曼城差距影響好大。

最後VAR覆核後,辛真高同尼基迪亞都冇越位,阿仙奴成功絕殺,爭標路上又殺退一大强敵,5年來首次連續13場不敗,繼續向第14個英格蘭頂級聯賽冠軍目標進發。

曼聯輸波之後,爭標機會渺茫,領隊坦哈格對失3球感到不滿,但佢哋有卡斯米路停賽,對防守力的確大有影響,若然超級防中在陣,未必會全失3分。