世界盃後第一場英超，曼城作客3:1挫列斯聯，一場戰果正常、表面睇嘅普通勝仗，對艾寧夏蘭特卻有非凡意義。
2000年7月21日，艾寧夏蘭特出生於列斯市，當時佢爸爸正值全職球員生涯嘅尾聲，効力於列斯聯。直至囝囝3歲，夏蘭特一家遷回祖家挪威，之後少年天才出現，顯露特殊入球能力，配上完美身體條件，直至今日，成為超級入球機器。
爸爸亦有返到艾蘭路球場，睇囝囝對舊東家嘅比賽。艾寧夏蘭特上半場已有單刀機會，但畀列斯聯門將梅斯利亞出迎擋救。
曼城佔盡優勢，即使基亞利殊敗家，近門射失必入波，仍然喺補時階段，憑洛迪卡斯簡迪射成1:0。
換邊後，輪到艾寧夏蘭特表演時間，51、64分鐘左右開弓入波，基亞利殊敗完家，以兩個助攻彌補過失。柏斯高史杜爾克為列斯聯破蛋。
列斯聯領隊馬殊，曾經執教奧地利薩爾斯堡，當時艾寧夏蘭特初出道，正正係佢愛將。佢賽後表示：「艾寧有特殊嘅入球能力，比以前更具饑渴感，呢種感覺能夠感染全隊。」
艾寧夏蘭特表示，挪威冇份踢世界盃，只能夠喺屋企睇直播，令佢更渴求入波。只需要14場，已入20球，令佢成為英超史上，最快達成入球20大關嘅球員，遠遠超越原紀錄保持者奇雲菲臘斯（21場）。
呢個入球效率，喺5大聯賽亦傲視同群，即使梅開二度，對夏蘭特已成家常便飯，入球極限幾時先至會出現？
曼城贏波後，15戰35分回升次席，落後榜首阿仙奴5分，周六晚主場對愛華頓。
