耶穌仔養傷，無損阿仙奴攻力，因為有尼基迪亞。呢位英格蘭前鋒連中三元，帶領球會周六英超主場5:0大勝錫菲聯。
另一倫敦球會車路士，正因前鋒冇料，主場0:2負賓福特，唔止打回原型，仲要開始進入長達一個月嘅地獄賽程，普捷天奴，頂得住冇呀？
阿仙奴周中歐聯贏西維爾，中鋒加比爾捷西斯演出精彩，但不幸受傷，又要休息一段時間。24歲嘅尼基迪亞又臨危受命，由於對手較弱，呢位兵工廠自家青訓產品，唔單止完美代替耶穌仔，仲喺28 、50、58分鐘入波，取得個人今季首3個英超士哥。
葡萄牙中場法比奧韋拉之後亦射入12碼，得到今季首個聯賽入球。日本後衛冨安健洋後備上陣，第50次為阿仙奴披甲，補時6分鐘助攻得手，更係佢加盟後第1個士哥。阿仙奴點點開花，一個完美賽日。
計前鋒兵源，車路士唔會差得過阿仙奴，但以尼高拉斯積遜為首嘅鋒線，硬係唔識入波，一堆翼鋒亦起唔到作用。主場對賓福特雖然佔優，但把握力極差，反而畀對手兩個突擊搞掂，3勝1和走勢終止。
嚟緊一個月，車路士進入超級地獄賽程，順序對熱刺、曼城、紐卡素、白禮頓、曼聯。車仔萬一唔好彩全部輸晒，由目前嘅11位跌落護級區，一啲都唔出奇。
