Here We Go！皇馬嘅巴西中場卡斯米路，正式落實加盟曼聯，據《ESPN》報導，總轉會費可高達7000萬鎊，當中6000萬鎊係依家畀、1000萬鎊係附加條件。
至於30歲嘅卡斯米路，就會獲得一紙4年合約，附帶自動續約1年條款，周薪有指高達35萬鎊，若果曼聯能夠進軍歐聯，周薪會再遞升。
由於要申請工作證同體測，卡斯米路應該趕唔切喺周二凌晨嘅雙紅會上陣，佢嘅地標戰，應該會係下周六英超作客修咸頓。
卡斯米路天價加盟，連埋華拉尼、C朗，曼聯前中後三線集齊皇馬喺歐聯3連霸嘅主力，加埋一齊係咪會有關聯技？拭目以待嘞。
雖然轉會費實在係幾貴，但呢單交易對三方嚟講，暫時睇都算係三贏之局。曼聯經過兩場波之後，已完全展示出球隊真正實力，隨時連中游球隊都不如，唔大刀闊斧買人堅係等死。
除咗卡斯米路，據報曼聯仲想買中堅、中場、右翼同前鋒，普列錫、安東尼、奧巴美揚、沙域等等都係曼聯嘅目標之一，預計未來呢10日，曼聯仍然會有轟動嘅轉會落實新聞。
