'

【英超】官宣!利物浦引入鋒線新核心 紐尼斯堅係瓣瓣齊 但一個弱點成隱憂

曼城新球季買埋艾寧夏蘭特,除咗贏歐聯冠軍,亦要喺英超鍊贏利物浦,唔會次次都贏1分咁好彩。紅軍亦不敢怠慢,正式宣佈成功收購賓菲加中鋒紐尼斯。

利物浦今次真係開大水喉,買紐尼斯嘅轉會費,原本係8000萬歐元+2000萬歐元獎金,不過利物浦仲係有啲肉赤,盡最後努力游說後,終於氹掂賓菲加,總額同樣係一億歐元,但就改為7500萬歐元+2500萬歐元獎金,並正式官宣。

利物浦美國老細,一向精打細算,買球員出價謹慎,之前最高收購價,係2017年以7500萬鎊羅致雲迪積克,今次肯大手出擊,出到破球會紀錄嘅一億歐元,都係迫於無奈。依家紅軍鋒線面臨巨大動盪,文尼好大機會離隊,沙拿、法明奴合約明年夏天到期,的確需要注入新力量。

紐尼斯今年只有22歲,係烏拉圭國腳,上季各項賽事出場41次,攻入34球,風頭直迫麥巴比同夏蘭特,當中歐聯射入6球,有2球正係對利物浦時取得。佢嘅特點係作為高大中鋒,技術相當全面,同時可以擔任左翼,初步睇絕對有力成為未來鋒線核心。

不過,紐尼斯有個弱點,上季佢雖然有超靚仔嘅比賽數據,但近兩季唔計染疫,受傷次數多達6次,合共傷停131日,下季由葡超去到身體對抗強度更大嘅英超,會唔會更易受傷?曼城新兵夏蘭特上季喺德甲亦經常倦勤,睇嚟兩位神鋒都要諗諗計喇。