【英超】完美ko王者 瘋狂破紀錄 艾美利有信心入前4!維拉1:0挫曼城 哥迪奥拿向黑馬寫個服字

英超進入大混戰時代!周四凌晨英超快車,阿士東維拉以完美演出,主場1:0挫王者曼城後進佔三甲,領隊艾美利表示,若果能維持目前水準,超級大黑馬絕對有力問鼎前四!

憑里安拜尼74分鐘入波,維拉全取3分升上第3位,目前僅落後榜首阿仙奴4分。艾馬利賽後亦正式向列強下戰書:「我哋嘅表現真係好到令人難以置信!坦白講,依家我哋正正就係處於前4位置,假如我哋Keep到呢個表現,我有信心會達成呢個成就(前4)。」

曼城賽前有左翼杜古受傷,基亞利殊停賽,要由科頓擔正,同祖利安艾華利斯、貝拿度施華支援夏蘭特,呢個正選陣容依然星光熠熠,但主場嘅維拉毫無懼色,一開波照同你搶,柏奧托利斯妙射,被艾達臣飛身撲走;完半場前,甸尼傳中畀杜格拉斯路爾斯頂入,但被判出界在先,已令入肉攻勢唔多嘅曼城響起警號。

換邊後,維拉繼續攻,終於喺74分鐘搵到缺口,里安拜尼喺中場長驅直進後起腳,為維拉射入全場唯一入球。維拉今場嘅高壓逼踢法,令曼城只錄得兩次射門,哥迪奧拿輸得心服口服,承認優勝劣敗。

今場亦係維拉自2013年9 月以來,再次能夠擊敗曼城;而佢哋連續14場主場聯賽贏波,亦平咗球會史上最佳紀錄。今季15戰32分排第3,亦係維拉自1980/81年球季以來嘅最佳成績,當季維拉係聯賽冠軍。

至於曼城則連續4場聯賽未贏過,目前已經跌到落第4位,前3場和波,今場洛迪停賽仲即時輸埋,證明呢位西班牙中場係幾咁重要。另邊廂利物浦由雲迪積克、蘇保斯拉爾入波,作客2:0挫錫菲聯,繼續排第2,少阿仙奴2分。