【英超】完場前入兩球逼和利物浦!勢攞歐聯入場券 維拉英雄艾美利:值得自豪嘅一季

周二凌晨英超獨腳戲,阿士東維拉再次展現超強勁靱力,憑後備中場杜蘭喺比賽末段梅開二度,主場3:3逼和利物浦,極大機會取得下季歐聯參賽資格。

維拉搶番一分之後,37戰68分排第4,熱刺36戰63分,仍有5分距離。只要熱刺周三對曼城失分,維拉就可以得到歐聯入場券。就算熱刺咁叻仔搞掂曼城,維拉仍然有一場波喺手,周日煞科作客水晶宮。

無論下季係踢歐聯或歐霸,以維拉人腳能夠得到呢個成績,實在抵讚到極點,居功至偉嘅領隊艾美利,喺對利物浦嘅主場謝幕戰後亦話,球隊度過值得自豪嘅一季。

「我哋為呢個賽季感到自豪,之後會積極準備周日對水晶宮嘅比賽,所有嘢都掌握喺自己手上!我吔好享受今季,亦非常感動。」佢特別感謝主場球迷:「勝利係獻畀你哋,因為你哋永遠都咁支持球隊,支持球員!」

維拉今場贏波即確定歐聯席位,但開賽2分鐘即失守,沙拿右路傳中,省中人後令維拉門將達米安馬天尼斯擺烏龍,利物浦領先1:0。維拉喺12分鐘由泰利文斯追成1:1。23分鐘,祖高美斯傳中畀加普建功,紅軍半場領先2:1。

易邊後3分鐘,利物浦由昆沙頂入遠柱,拉開比數3:1;但維拉未有放棄,發揮今季經常保持嘅強大靱力,佢哋先喺85分鐘,由杜蘭把握紅軍後場犯錯射成2:3。3分鐘後,穆沙戴亞比妙傳,撞中杜蘭大脾笠死艾利臣,維拉逼和利物浦3:3。