冬季轉會窗關閉前，車路士終於同賓菲加達成協議，成功收購阿根廷中場安素費南迪斯，轉會費1.06億鎊（約10.5億港元），令安素成為英超史上最高身價球員。
因支付期數問題，呢單交易幾乎告吹，係拗到死線前，兩會先至達成協議。安素費南迪斯身價已超越基亞利殊（1.01億鎊）、盧卡古（9747萬鎊），締造新紀錄。
安素費南迪斯只有22歲，係世界盃冠軍成員之一，踢法全面，防守夠硬朗之餘，傳送能力亦出色，可以同時擔任佐真奴、簡迪嘅角色。財大氣粗嘅車路士，為求奪得心頭好、瘋狂出價，亦決心換血，先以1200萬鎊將佐真奴賣畀阿仙奴；而簡迪估計今夏亦會走人。
為免觸犯FFP（財政公平競賽原則），車路士走法律罅，同安素費南迪斯簽約至2031，向賓菲加先支付4000萬鎊，其餘分6期支付。賓菲加今季將達雲紐尼斯售予利物浦，已收穫8500萬鎊，相隔不足半年，再多一個天價交易，呢間葡萄牙球會，培養新人再轉售，確有一手。
車路士雖然成績欠佳，但新班主保利揼水嘅豪氣程度，完全唔輸畀阿布，上場後半年，狂燒6億鎊買人，單係今次轉會窗，收購及借用8人，已經用咗超過3億鎊，除安素費南迪斯，仲有梅迪歷（8850萬鎊）、班洛特巴迪亞舒尼（3500萬鎊）、馬杜基（2900萬鎊）、文路古士圖（2600萬鎊）、安祖山度士（1800萬鎊）、大衛科芬拿（1100萬鎊）、祖奥菲歷斯（借用費970萬鎊）。
同安素費南迪斯一樣，以上球員都非常年輕，車路士將進入大換血時代，將中場佐真奴賣畀阿仙奴，只係換血行動第一步，之後會陸續有來。
班主瘋狂燒錢砌車，依家壓力落晒領隊樸達身上，如果車路士下半季未能窮追，攞番歐聯參賽資格，樸達想留低都難。
近日英國球壇傳出消息，指球會高層有同莫連奴接觸，唔排除搵佢下季再回巢，雖然摩Dad已澄清會留喺羅馬，但世事嘅嘢邊話得埋？加上大把名帥目前仍然待業，而車路士同第4位曼聯相差多達10分，對樸達嚟講，呢個任務相當艱鉅，隨時佢自己都預咗教埋今季就玩完。
