【英超】安東尼開齋 奧拿拿犯錯 曼聯1:1和般尼;奧脫福球迷喪噓 坦克:我哋夠晒娛樂性

真係「好好睇」呀!周六英超,曼聯有安東尼射入今季聯賽處子球,但仍然被般尼作客逼和1:1。賽後領隊坦哈格繼續於記招領放,自詡曼聯係最有娛樂性嘅球隊。

「冇錯,今場個賽果的確唔應該發生,因為我哋通過漂亮足球嚟取得領先優勢,然後喺之後最尾幾分鐘就放棄……不過我哋創造咗好多機會,係英超中最有活力、最有娛樂性嘅球隊之一。」

曼聯今場以海倫掛帥,安東尼、加拿曹、般奴費蘭迪斯支援,上半場的確有唔少機會,但最後一腳處理得唔太好,般奴曾窄角度射中柱。換邊後尾段進入高潮,79分鐘,安東尼殺入禁區建功,取得今季首個英超士哥。但完場前,奧拿拿出迎打中岩度尼個頭,被罰12碼,岩度尼中鵠,般尼逼和曼聯1:1。

曼聯目前以34場54分排第6,同踢少兩場、第5位嘅熱刺相差6分,如果未能捧足總盃,相信來季好大機會只能出戰歐協聯。

坦哈格賽後受訪,除咗話自己隊波夠娛樂性,亦怨過運氣唔好及球證:「最近幾個星期,我哋喺判決方面好似有啲黑仔,失咗好多球12碼,今次呢球係合理嘅,但其他呢?判決嘅一致性呢?」

事實上,今場比賽期間及完場後,奧脫福均有唔少向坦哈格發出嘅噓聲,坦克咁回應:「我要管理一隊波,而佢哋係球迷,當時曼聯需要更有活力嘅球員,需要改變戰術,所以換人係正確決定!我都冇耐性,但係建立球隊需要耐性,曼聯喺2004、05嗰陣都唔係踢得好,因為當時佢哋建立緊一個王朝。」