4連勝！曼聯周日英超重頭戲，發揮高汁穩守突擊，主場3:1擊敗阿仙奴，新將安東尼開紀錄，加上福仔突擊王上身，令阿仙奴今季首度輸波，5連勝斷纜。
巴西翼鋒安東尼，上周四轉會窗最後一日，以1億歐元身價由阿積士轉投曼聯，創下今個夏天最高紀錄，唔少人質疑佢值唔值咁貴，但坦哈格對愛將投信心一票，即時畀佢做正選。
食住3連勝氣勢，除加入安東尼，曼聯陣容冇乜大變動，坦哈格承認現時紅魔唔適宜主攻，即使主場亦要打穩守快擊，可以發揮威力，事實亦證明正確。
阿仙奴全場係比較主動嘅一方，但後防谷得較上，畀曼聯中前場快速突襲玩殘。35分鐘，拉舒福特中路引來阿仙奴後衛包圍，斜傳右路，安東尼無人看管射成1:0。
阿仙奴60分鐘由布卡約沙卡追成1:1後，希望食住個勢進攻，可惜中場真係輸晒、技不如人，艾歷臣、般奴先後用靚直線劏穿阿仙奴後防，66、75分鐘畀拉舒福特兩次單刀，為曼聯射成3:1完場。
今場C朗繼續後備，即使冇入波，但落力同肉緊程度爆燈；領先3:1後，出埋卡斯米路、麥隊出嚟防守，麥佳亞雖然一出嚟就食黃，但之後總算貢獻幾個解圍，信心可望提升。紅魔經歷開季兩連慘敗，真正痛定思痛，所有球員搏命打爭氣波，打出4連勝走勢，對手仲包括利物浦、阿仙奴。
經過6輪，阿仙奴仍以15分居榜首，曼城、熱刺14分，白禮頓13分，曼聯12分，車路士10分，利物浦9分。李斯特城繼續1分包尾，周日作客白禮頓大敗2:5，領隊羅渣士應該好快會玩完。
