【英超】孫興民詐胡大三元 殘缺熱刺3連敗!維拉作客反勝2:1升第4 艾美利超強!

艾美利帶中型班功力,真係一個字:堅!維拉繼續發揮超級黑馬本色,周日英超作客2:1反勝受嚴重傷兵困擾嘅熱刺,升上第4位,只落後榜首阿仙奴兩分。

熱刺陣容天殘地缺,3連敗後由榜首跌至第5位。賽前更收到令人傷感消息,該隊功勛名帥,亦曾經喺96歐國盃帶領英格蘭殺入4強嘅雲拿保斯,經歷跟病魔長期惡鬥後,周六已逝世,享年80。

雲拿保斯係為人尊敬嘅領隊,最為人記得係96年帶領英格蘭殺入歐國盃4強,91年為熱刺最後一次捧起足總盃冠軍奬盃。更加難得係,佢當年以英籍教練身份帶領巴塞隆拿征服西甲,一生戰功顯赫。

成就顯赫

熱刺官方發文悼念,球員今仗亦佩戴黑色臂章。經過兩連敗,雖然有占士麥迪臣,一對正選中堅基斯甸羅美路、雲迪尹及李察利臣、比列錫、比蘇馬等一大串傷兵,但熱刺上半場開波即佔盡優勢,有多個入波機會,孫興民已錯失兩個大餐士,古路施夫斯基亦近射中柱。

去到22分鐘,盧施素終於為熱刺先開紀錄,孫興民之後有個半單刀入得靚,可惜僅僅越位在先,未能拉開紀錄。維拉攻勢雖少,但亦藉熱刺防線陣容殘缺,中鋒奧尼屈堅斯食過詐胡,喺補時最後階段終於由柏奧托利斯建功,呢位守將接應罰球頭槌破網,扳平1:1。

熱刺中前場搏得太盡,又欠人腳調動,下半場初段動力大減,維拉乘勢反壓對手,製造唔少危險場面,奧尼屈堅斯61分鐘中路入楔,喺熱刺一對中堅賓戴維斯、艾馬臣艾巴里斯杜夾擊下,依然可以射遠柱入網,反超2:1。熱刺之後反攻都有威脅,孫興民食多兩次詐胡,完成大三元,加上維拉門將達米安馬天尼斯兩度救出險球,主隊難逃3連敗命運。

熱刺3連敗