【英超】孫仔單刀唔入 曼城贏波 4連霸在望;普帥賽後插球迷:熱刺內外都係咁脆弱!

呢場贏埋,4連霸喇!周三凌晨英超獨腳戲,曼城作客熱刺,憑夏蘭特下半場連入兩球,淨勝2:0重登榜首,煞科戰主場贏韋斯咸即肯定奪冠,實現英超史上首個4連霸。阿仙奴球迷當然最失望,特別係86分鐘見到孫興慜單刀唔入,隨時血都嘔埋出嚟。

榜首形勢,曼城37戰88分,比阿仙奴多2分,最後一輪曼城主場對韋斯咸、阿仙奴主場愛華頓。如果仲有最戲劇化場面,將會係曼城和波、阿仙奴全取3分,屆時兵工廠就會憑較佳得失球差捧盃,不過呢個機會睇嚟凍過水。

除咗曼城球迷開心,維拉同熱刺Fans亦瘋狂慶祝,熱刺輸波,維拉肯定成為第4名,得到下季歐聯入場券,領隊艾美利締造驕人成就;至於熱刺球迷,大部份亦因為死敵阿仙奴失冠而狂開香檳,愛隊冇得踢歐聯都冇乜所謂喎。

面對呢種球迷文化,熱刺主帥普斯迪哥路相當不滿:「我終於明白喇…好遺憾,喺過去呢48小時入面,我見到熱刺嘅基礎係非常脆弱,無論內外都係一樣!可能我Out喇,我淨係想贏,其他嘢唔會理!」

Soccer Football – Premier League – Tottenham Hotspur v Manchester City – Tottenham Hotspur Stadium, London, Britain – May 14, 2024 Tottenham Hotspur manager Ange Postecoglou REUTERS/Dylan Martinez

熱刺上仗終止4連敗,今場士氣反彈,上半場控制戰局時間更多,開賽6分鐘快攻,賓坦古亞禁區內勁射,畀曼城門將艾達臣托出。完半場前,貝拿度施華近門抽射,以為必入,今次輪到熱刺中堅達古仙救駕,兩隊0:0完半場。

換邊後6分鐘,曼城打破悶局,又係呢對組合,夏蘭特接應迪布尼右路妙傳,近門輕鬆撞入,69分鐘,奇雲迪布尼同龍門艾達臣同時傷出,由杜古及奧迪加入替。熱刺尾段反撲好有威脅,86分鐘更出現黃金機會,孫仔單刀,但最後一射畀奧迪加用腳擋出,呢球對今季爭標好關鍵,若然曼城被追和,最大得益者就係阿仙奴。不過都要讚吓奧迪加,每次臨危受命都有唔錯表現,哥迪奧拿賽後亦大力表揚呢位後備門將,係贏波重要功臣。

曼城保住不失,補時階段杜古禁區內博得12碼,夏蘭特操刀射成2:0完場。哥迪奧拿賽後形容,曼城依家好似打網球咁,只要保持多一個發球局,就可以結束比賽,但同時亦係最困難嘅時候。