【英超】威完即跌watt 已成定律!曼聯1:2負森林 棄將艾蘭加爭氣 醒過水貨安東尼9倍

曼聯真係極品,蕩氣迴腸反勝阿士東維拉之後,周日凌晨英超又打回原形,作客1:2不敵諾定咸森林。

上仗藉下半場將士用命,連入3球,3:2反勝維拉,魔性堅澎湃,令坦哈格避過主場3連敗,但驚喜原來一閃即逝,今場面對護級球隊森林,曼聯球員又再冇釐神氣,輸波好合理。

今次係英超史上,曼聯第2次不敵森林,上次係1994年,已經相隔29年;而單計12月,紅魔輸咗5場,係繼1933年之後出現呢個情況;總計2023年,連埋今仗輸21場,以曼聯隊史統計,列歷來單年最多輸波場數第4位。

曼聯中鋒海倫,對維拉取得致勝入球後、英超終於開齋,但因病缺席今仗,用拉舒福特做單箭頭;一億身價安東尼,做番正選右中場,繼續貫徹水貨本色,下半場初段更疑似有傷被換走。

森林64分鐘由尼高拉杜明基斯開紀錄;78分鐘,曼聯最有威脅嘅加拿祖,截得森林門將端拿嘅大意傳送,交畀拉舒福特射入扳平;82分鐘基斯韋特禁區邊施射,為森林奠定勝局。

呢個致勝球,係由安東尼艾蘭加助攻。呢位曼聯青訓產品,今場大打爭氣波,評分最高。佢同安東尼位置重疊,季前慘被曼聯出售,加盟森林後,艾蘭加有4個入球、6個助攻,而安東尼呢兩瓣仲係零。

森林早前換領隊,葡萄牙籍主帥紐奴入主後教咗3場,除首仗欠運輸畀般尼茅夫,之後連贏紐卡素、曼聯,發揮新帥效應,令森林脫離降班區,升上第16位;曼聯仍然排第8。

同日賽事,曼城以超過8成控球率,2:0輕取錫菲聯,洛迪卡斯簡迪、祖利安艾華利斯建功,19戰40分升第3位,落後榜首利物浦兩分。

曼城輕鬆取3分。

維拉面對般尼,雖然兩度被追和,仍憑杜格拉斯雷斯89分鐘入12碼,以3:2險勝對手,追至利物浦同分,因得失球差暫列第2。

維拉衝擊冠軍。