'

【英超】好憎謝拉特?維拉換帥即變身 4:0炒賓福特 艾邦拉荷:古仔欠一個道歉!

阿士東維拉球員憎謝拉特憎到入骨?「神奇隊長」被炒後首戰,維拉眾將即時脱胎換骨,周日英超主場4:0大勝賓福特!

上周四凌晨,維拉作客富咸吞3蛋,維拉擁躉喺看台上大叫:「我哋要炒謝拉特!」結果開完記者會後,球會高層通知謝拉特,即時終止合約。

相隔唔夠4日,維拉於暫代領隊艾朗丹斯帶領下變咗另一隊波,今場維拉收起隊長麥堅恩同積及藍斯,將隊長臂章交畀門將達米安馬天尼斯,一眾球員醒神晒,一開波就狂攻賓福特。

前鋒里安拜尼兩分鐘已打開紀錄,射手丹尼艾格斯好耐冇入波,今場一嚟就起孖,7及14分鐘建功,助維拉開波唔駛3個字,已經領先3:0。下半場奧尼屈堅斯整多粒,淨勝4球。12場聯賽過後,維拉取得今季第3場勝仗。

坊間及英國傳媒大事報導及推測謝拉特死因,戰術沉悶、唔識用人等等係例牌,而講衰乜,其實仲有其他,例如季前列下10幾條規則,要球員嚴格遵守,引起好大反彈。講得最多嘅係褫奪泰朗明斯嘅隊長資格,令更衣室充滿矛盾,影響球員爭勝心。

近日,維拉名宿艾邦拉荷指,古天奴欠謝拉特一個道歉。上季中謝拉特上任時,將被全面冷落嘅古天奴從巴塞隆拿帶走,並加以重用,無奈古仔唔爭氣,除起初踢過幾場好波外,之後越踢越沉,維拉成績唔掂,佢當然有責任。依家謝拉特走埋,古仔仲會唔會有翻身機會呢?