榜首領前優勢增至7分！阿仙奴甩開爭標對手曼城、強勢進入2023，數據顯示，兵工廠極有機會等到喇、堅重奪聯賽冠軍！
2023年第一擊，阿仙奴作客4:2擊退白禮頓，次席曼城則被愛華頓逼和1:1，第3位紐卡素亦同列斯聯悶和0:0，令阿仙奴更被睇好，足智彩賽後將佢同曼城，並列1.85倍奪標大熱。
踢咗16輪，阿仙奴贏足14場，弗到冇朋友，係英格蘭頂級聯賽史上，第6隊前16輪至少贏14場球隊。
之前5隊，分別係曼聯（1907/08）、熱刺（1960/61）、車路士（2005/06）、曼城（2017/18）、利物浦（2019/20），佢哋最後都成為當季聯賽冠軍。
面對白禮頓，阿仙奴開波66秒，已由布卡約沙卡先開紀錄；隊長馬田奧迪加特，持續巨星級表現，喺佢帶動之下，球隊進攻流暢悅目，戰至39分鐘，呢位挪威國腳入埋波，藉對手解圍角球，大禁區勁抽掛網。
換邊後僅2分鐘，尼基亞迪執雞射成3:0，佢代替有排抖嘅加比爾捷西斯做正選中鋒，聯賽重開後兩場都有波入，表現出色。
三笘薰為白禮頓扳回1球，之後又到馬田奧迪加特表演，後半場放出致命長傳，畀加比爾馬天尼利射成4:1，白禮頓最後由伊雲費格遜建功，輸2:4完場。
至於曼城開波24分鐘，又由艾寧夏蘭特先開紀錄，呢部入球機器取得今季第21個聯賽士哥。雖然之後繼續控制戰局，但面對愛華頓死守，真正威脅唔多，反而喺64分鐘，畀迪馬雷格雷射入世界波，慘失兩分。
可能唔滿意只入得1球咁少，艾寧夏蘭特踢到起晒火，上半場44分鐘從後雙腳飛剷米高蘭高，相當礙眼，只食黃牌，冇被趕出場真係執到。
2023年第一戰，曼城周五凌晨作客車路士，阿仙奴周三凌晨主場對紐卡素，兩場都係極重要嘅硬仗。
