要不是奧拿拿……隨時輸半打？本周英超曼市打吡，曼城喺全面佔優嘅情況下，憑夏蘭特兩射一傳，作客以3:0大炒曼聯，如果唔係奧拿拿今場屢獻神救，隨時輸5、6球都似。
曼聯喺賽前舉行向已故名宿卜比查爾頓致敬嘅儀式，場內亦有球迷拉banner，數名卜比Sir嘅舊隊友，陪同曼聯領隊坦哈格獻花，之後兩軍球員進行1分鐘默哀儀式。
曼城今場繼續以夏蘭特掛帥，貝拿度施華、艾華利斯、基亞利殊同科頓支援，火力全開。至於曼聯排出一條令人擔心嘅防線，伊雲斯拍麥佳亞扼守中路，連迪洛夫客串左閘，門將依然係奧拿拿。
曼城實力何止勝一籌，唔少球迷都預咗會係一場攻防戰，但點都估唔到奧拿拿今場上身，開賽僅8分鐘，奧拿拿先飛身擋出科頓嘅頭槌，之後夏蘭特想補射，又畀奧拿拿快一步撥走個波，然後麥佳亞喺白界線前解圍。
過到初一過唔到十五，曼城死球攻勢，洛迪喺禁區內被海倫拉跌，曼城獲得12碼，夏蘭特處理先開紀錄。曼聯靠零星反擊製造威脅，可惜海倫失機，轉過頭曼城亦有夏蘭特嘅必入頭槌，點知奧拿拿反應奇快，上演飛身神救，不致多失。
換邊後，曼聯都係冇乜起色，49分鐘，貝拿度施華左路傳中，夏蘭特終於頂破奧拿拿，領先2:0。曼聯冇乜火下，去到80分鐘再畀夏蘭特表演神助攻，科頓門前完成簡單任務，曼城贏3:0完場。
夏蘭特今場入兩球，迎來球會生涯200球里程碑。其中，佢為莫迪入20球，為薩爾斯堡入20球，多蒙特86球，曼城65球。同時，佢轉戰英超後23次作客比賽入20球，成為英超史上作客最快入20球嘅球員。
仲有，呢位挪威神鋒迄今10場英超入11球，繼續喺射手榜領放，而曼聯全隊今季亦只係入咗11球，可見夏蘭特係有幾咁誇張。
另邊廂，一向被視為毒瘤嘅奧拿拿，今場作出7次撲救，表現算係加盟曼聯以來最好，可惜仍然無法阻止曼聯大敗。曼城目前繼續喺聯賽榜第3位，同阿仙奴同分、落後熱刺兩分。
