Catch Me If You Can！阿仙奴反客為主，周日作客史丹福橋，全面佔優下以1:0擊敗車路士，近7場英超6勝1和，任你曼城點追，仍領先兩分高居榜首。阿仙奴主帥阿迪達，領軍150場贏87場，超越嘅雲格及格拉咸，成為同時期史上最佳領隊！
車路士已4場英超不勝，其中一個原因當然係傷兵問題日益加劇，尼高路簡迪、列斯占士、芝維爾先後受傷緣盡世界盃，啱啱打番起嘅Kepa阿列沙巴拿加，同樣遭受厄運，陣容天殘地缺。
奧巴美揚由紅變藍，為車路士倒戈對舊會，賽前更加作出「助攻」，喺一個電視宣傳中講「Nothing Personal, I’m Back, I’m Blue,.I’m Ready」，疑似激發阿仙奴鬥志，而auba自己同夏維斯、美臣蒙特合作攻堅，但欠缺供應，威脅唔大。
車仔今仗雖然主場，但主力防守，傷兵咁多亦無可厚非，樸達當前球會白禮頓咁部署，大踢穩守突擊戰術，所以阿仙奴即使佔據主動，但上半場真正具威脅力嘅攻勢唔多。最接近係18分鐘，經過一連串精彩快速傳球，加比爾馬天尼利左路傳遠柱，加比爾捷西斯無人看管，但飛盡下頂斜。
阿仙奴全場反客為主，特別係湯馬士柏迪、格列沙加，保持極佳狀態，攻守兼顧、贏晒中場。佢兩個下半場繼續帶動球隊，向車仔展開綿密攻勢，終於到63分鐘，藉角球由中堅加比爾馬加希斯近門撞入，打開紀錄。
阿仙奴擁躉今仗特別開心，除全取3分外，奧巴美揚倒戈完全冇料到，下半場初段已被調走，全場只有8次觸球，1次射門被阻，存在感近乎零。
另外兩名鋒將夏維斯、美臣蒙特亦唔好得幾多，稍後都退下火線，可見車仔攻力之疲弱，落後下亦欠缺入肉埋門機會，攻勢往往喺中場已畀湯馬士柏迪、柏列沙加破壞，全場處劣勢之下，輸得非常合理。
自阿迪達執教後，阿仙奴聯賽4次作客車路士，除和過一場，已達成3連勝紀錄，係兵工廠悠久球會歷史上，首次達成呢項成就。
主帥阿迪達賽後亦罕有咁講爭標情況：「係，今日我哋處於爭標球隊之列，但足球世界，今日唔知聽日事，尤其曼城係一支絕對值得尊重嘅偉大球隊，我哋的確變得越嚟越好，但一定要保持專注。」
而車仔樸達新帥效應逐漸消失，繼大敗畀白禮頓後再輸一場，之前兩場亦和曼聯同賓福特，目前距離阿仙奴已有13分之多，即使世盃後主力傷兵有望陸續復出，但相距太遠，後上機會相當渺茫。
