後備雙麥打救坦克！曼聯喺周六英超幾乎又出事，好彩麥湯文尼冇畀領隊坦哈格雪到硬，喺補時階段連入兩球，絕殺球仲要係被坦哈格褫奪隊長臂章嘅麥佳亞做助攻，喺主場驚險反勝賓福特2:1。
賽後曼聯喺聯賽8戰12分，成績當然唔及格，但今場奇蹟反勝，總算令坦哈格下台壓力稍為紓緩，門將奧拿拿今場亦唔使孭大鑊，嚟緊係國際賽期，曼聯可以趁呢段時間作出調整。
由於球會傳奇領隊費格遜妻子離世，曼聯球員今仗臂纏黑紗作賽。事實上，曼聯出賽陣容的確令唔少人擔心，一對中堅分別係莊尼伊雲斯拍麥佳亞，達洛治、連迪路夫踢閘，加埋門將奧拿拿，齋睇名都覺得性感。
至於賓福特由史達哥沙取代因病缺陣嘅費根把關，一對中場係兩名丹麥國腳馬斯亞斯恩臣、洛哥。
26分鐘，曼聯防線又又又犯錯，卡斯美路誤傳，賓福特打反擊，連迪洛夫未能清脆解圍，馬斯亞斯恩臣起腳，個波速度唔高，可惜奧拿拿反應慢被射入，紅魔半場落後一球，慘被自家球迷柴台。
曼聯換邊後用艾歷臣入替卡斯美路，不過仍未能扭轉頹勢，如果唔係達洛治護空門，早已宣判死刑。比賽末段，曼聯圍攻賓福特，89分鐘般馬迪爾食詐胡後，補時終於出現奇蹟，麥湯文尼先成補中追平1:1，去到補時4分鐘，麥佳亞二傳，麥湯文尼門前頂入，曼聯成功絕殺賓福特2:1，終止兩連敗。
賽後坦哈格受訪，當然激讚麥湯：「我換佢出嚟嘅目的，就係想佢帶來能量同埋創造力，入波係要靠一啲運氣，而我哋創造咗自己嘅運氣。」
「麥湯文尼帶住正確嘅態度投入比賽，積極主動，充滿活力。佢好有決心要爭取入波！正正係呢個信念，令佢獲得運氣。佢代表住曼聯，佢為球隊嘅隊徽、球衣而戰，我甚至認為佢會為此獻出生命。」
