麥佳亞大翻身！今晨英超尾場，曼聯作客以2:1力挫錫菲聯，麥湯文尼又入波固然搶鏡，不過鋒芒始終不及中堅麥佳亞，呢位前隊長繼續交出水準，獲選為賽事最佳球員，一吐烏氣。
雖然麥佳亞被禠奪隊長之位兼被打入冷宮，但其實佢踢正選下，曼聯嘅勝率係極高！過去一年，麥佳亞正選上陣16次，曼聯共有15勝1負，勝率接近94%，可以話係曼聯嘅超級福星。
事實上，曼聯今場表現好一般，只得1分而包艇嘅錫菲聯，竟然都有12次攻門，不過紅魔防線好在有麥佳亞鎮守，101次掂波（全場最多）、攔截成功率100%、成功傳球76次（全場最多）、空中對抗成功5次（全場最多），獲選MOTM絕對係實至名歸。
曼聯領隊坦哈格，賽後當然大讚呢位曾經賣極都賣唔出嘅30歲中堅：「麥佳亞今場好主動，無論係控制及閱讀球賽，就連交波同埋轉邊都做得好好，踢出球迷同我都想見到嘅表現，我戥佢高興。」
曼聯賽前收到傳奇名宿去世嘅噩耗，今場比賽開始前，一眾球員為呢位1966年英格蘭贏得世界盃嘅功臣默哀，隊長般奴費蘭迪斯代表球會將花圈放喺球場上面，球迷則喺比賽期間不時高呼卜比Sir嘅名字。
曼聯今場用海倫踢單箭頭，配合拉舒福特、般奴費蘭迪斯同安東尼攻堅，而上仗奇蹟反勝嘅功臣麥湯文尼、以及麥佳亞同時搶得正選，28分鐘，麥湯禁區內起腳得手，可惜6分鐘後佢喺禁區內犯手球，錫菲聯麥貝尼操刀扳平1:1。曼聯去到77分鐘，先由達洛治射入世界波、鎖定2:1勝局。
麥佳亞賽後反而冇乜一吐烏氣嘅言語，而係主要談及傳奇名宿卜比查爾頓：「今場贏波當然係好事，不過有啲嘢係凌駕足球，我哋備戰嗰時聽到呢個噩耗（卜比查爾頓逝世），大家都受到打擊……以往佢經常嚟更衣室鼓勵我哋，佢係曼聯真正嘅傳奇。我哋會懷念佢、全世界都會。」
