【英超】大癲!6蛋血洗錫菲聯;阿仙奴恐怖火力 破英超紀錄!達Sir:佢哋對自己有要求

阿仙奴入球停不了!周一深夜英超,阿仙奴再次發揮恐怖攻擊力,作客血洗錫菲聯6:0,創造英超歷史,連續3場作客贏5球或以上,誇張到癲!

阿仙奴目前落後榜首利物浦2分、同次席曼城相差1分,不過阿仙奴有個著數之處,就係佢哋得失球(+45)佔晒上風。由於嚟緊阿仙奴會喺周六主場迎戰賓福特,而利物浦同曼城周日對決,換句話講,阿仙奴周六只要贏波,就可登上榜首。

踏入2024年後,阿仙奴喺英超7戰全勝,總共攻入31球,平均每場入超過4球,作客先後炒錫菲聯6:0、血洗韋斯咸6:0、贏般尼5:0,阿迪達賽後當然大讚特讚:「入球多之餘而未有失球,證明佢哋對自己有要求,絕對係一場表現出色嘅比賽。」

達Sir大讚球員表現出色。

阿仙奴今場繼續用夏維斯踢正前鋒,兩翼為馬天尼利、薩卡,後備名單上亦見到久違嘅防中湯馬斯柏迪。開賽僅5分鐘,隊長奧迪加特就接應迪勤懷斯回傳射成1:0,13分鐘,薩卡傳中,令保高擺烏龍,15分鐘,馬天尼利妙射,阿仙奴已遙遙領先3:0。

25分鐘,馬天尼利靚交,夏維斯射成4:0。完半場前,輪到懷斯建功,阿仙奴半場已領先5球。換邊後阿仙奴放慢節奏,不過賓韋特唔放過入波機會,遠射得手,大勝6:0完場。