高普同利物浦，就係有一種魅力，令占士米拿即使大幅減薪，都願意續約紅軍。
四冠夢碎，同英超、歐聯獎盃擦身而過，但正如高普所講：「下季歐聯決賽邊度踢？訂機票先！」過度回憶係壞腦元素，新季新開始，笑迎未來先至係王道。
新球季組班，先嚟一個好消息，官宣續約老大哥占士米拿。由於已經約滿，呢位36歲英格蘭中場去向備受關注，但今次只續約1年，亦同時減薪。
你以為占士米拿老到冇人要，所以肯減薪留隊？錯晒！啱啱相反，佢仲咁弗，加上頂級作戰態度，絕對係典範級戰將，大把人爭住要，阿士東維拉、紐卡素同多支美職球隊，都提出聘約。但喺高普極力游説之下，老大哥願意留隊，繼續為紅軍追尋英超、歐聯冠軍夢。
占士米拿喺2015年以自由身由曼城轉投利物浦，共出場289次，上季踢39場，依然未見老態，單計抗壓能力，甚至仲好過艾簡達拿等年輕一代。
英女皇登基白金禧誌慶，占士米拿名列受勳名單，同加里夫巴利同得MBE勳銜。里奧費迪南獲OBE。
