利物浦早兩日喺社區盾以3:1擊敗曼城，新神鋒大戰，達雲紐尼斯先博到12碼，完場前仲整個插水式頭槌奠勝，表現完勝艾寧夏蘭特，夏蘭特備受質疑之時，作為對手嘅華基爾雲迪積克，就企出嚟力撐：「大家將會見識到夏蘭特嘅威力，佢係英超後衛嘅惡夢！」
從上場所見，夏蘭特明顯未適應英超節奏，完全未融入曼城嘅踢法之餘，喺VVD凍結下，夏蘭特掂波次數更寥寥可數，完場前離門幾碼射中楣，更令球迷質疑佢嘅信心、以致射術均未達新神鋒級數。
不過，VVD日前受訪時，就力撐夏蘭特係世界級射手：「佢踢法好直接，而且極度全面，頭槌、速度、身形全速有齊，佢一個機會就可以搞掂你。我哋上場能夠阻止到佢，全因為我哋聯防做得好好。」
謙厚嘅VVD其實唔係講客氣說話，早喺夏蘭特轉投曼城前，佢早已講過世界上最難搞嘅5大前鋒，係阿古路、美斯、麥巴比、夏蘭特同達雲紐尼斯。
「佢會係所有英超後衛最驚見到嘅人！每個球員都有壓力，尤其當你背負住昂貴身價，壓力自然更大，達雲紐尼斯亦如是。」
記者再問VVD，有咩方法可以盡快融入英超？「作為對手，我梗係唔會畀太多建議佢啦！不過，我認為唔使我講，夏蘭特自己都知要專注比賽，唔好理其他人嘅閒言閒語。」把口話唔提建議，但其實VVD都有醒吓貼士畀夏蘭特，堅係識英雄重英雄。
英超開鑼，曼城嚟緊星期日會作客韋斯咸，而利物浦就早一晚登場，作客升班馬富咸。
