【英超】夢劇院再淪陷!曼聯超級海鮮波 慘吞般茅3蛋 隊史首次主場輸畀平民對手

周六晩歐洲球壇出現兩大豪門慘案,曼聯主場對般尼茅夫,竟然大敗0:3,隊史上首度主場輸畀呢支平民對手。佢哋周中歐聯對手拜仁慕尼黑,同樣出現羞家一役,德甲作客1:5輸畀法蘭克福,孖紅魔衰埋一堆。

同周中擊敗車路士相比,曼聯陣容冇乜變動,主要係中鋒由海倫換上馬迪爾。雖然再受重用,但馬迪爾上半場依然一無是處,只有1次射門,共10次失去控球權。佢56分鐘被換走時,射門次數冇增加,再失多1次控球權,全場只觸球34次。

曼聯水準堅反覆,對車仔生龍活虎,面對中下游般茅反而毫無生氣,唔止攻力弱,面對般茅反擊,防線亦呈不穩,開波5分鐘已被蘇蘭基偷襲得手。雖然一直佔據主動,但曼聯攻勢並唔入肉,反而喺68同73分鐘輸多兩球,主場慘吞3蛋。

曼聯再次令人失望,奧脫福再次有唔少球迷提早離場,更大悲情可能會喺嚟緊周中出現,紅魔歐聯分組賽主場對拜仁,除咗必需全取3分,同時亦要同組加拉塔沙雷打和哥本哈根,你話難度有幾高。

曼聯對手拜仁亦慘遇大屠殺,由於後防不停犯錯,作客竟然1:5大敗畀法蘭克福,未能追上榜首利華古遜,繼續落後3分。