【英超】多謝大舊木中鋒敗家!曼城打得差 照贏森林2:0 助攻王撐住 剩低4場掃得晒?

曼城打多個,周日英超作客2:0挫森林。第12人唔係球證,係森林中鋒基斯活特,如果唔係呢位中鋒射術廢,踢得認真麻麻嘅曼城,未必可以全取3分。

曼城今仗繼續收起艾寧夏蘭特,由祖利安艾華利斯擔正中鋒,奇雲迪布尼、貝拿度施華等黃金中場支援,但面對下游球隊森林,竟然處於下風。全場射門次數森林14:11,危險攻門共3次,但森林全部未能轉化為入球。

森林中鋒基斯活特,有名你叫Chris Wood,人如其名真係似舊木,上下半場各有一次近距離近門施射嘅黃金機會,但把握力太差全部差失,浪費隊友助攻嘅努力。

32分鐘,曼城由加度華爾接應角球先開紀錄;經歷森林不斷反攻,全靠基斯活特失機保住不失之後,哥迪奥拿見勢色唔對,61分鐘換入夏蘭特,挪威殺神入場後10分鐘,接應奇雲迪布尼傳送,大步推入禁區,壓住對手射入遠柱,為表現麻麻嘅曼城鎖定勝局。

賽後,兩送助攻嘅奇雲迪布尼,以66.9%嘅得票率,當選英超官方全場比賽最佳球員。迪布尼今場72次觸球,傳球成功率85%(55次傳球47次成功),當中有3次關鍵傳球,創造1次絕佳機會,無愧中場大師之名。

即睇榜首雙雄形勢:
阿仙奴 35戰80分 ,餘下3仗
主 vs 般尼茅夫
客 vs 曼聯
主 vs 愛華頓

曼城 34戰79分,餘下4仗
主 vs 狼隊
客 vs 富咸
客 vs 熱刺
主 vs 韋斯咸