【英超】夏蘭特怪病 未定復出日期;哥迪奧拿灰晒 反勝盧頓補唔番

雖然曼城於周日英超作客2:1反勝盧頓,結束4場不勝走勢,但神鋒艾寧夏蘭特怪病纏身,未確實幾時先可以復出,先係真正大件事。

曼城公佈對盧頓一戰球員名單後,大家先赫然發現艾寧夏蘭特唔喺名單中,事前並冇徵兆,哥迪奥拿解釋挪威神鋒缺席嘅原因:「佢腳部出現骨應力性反應。對維拉嘅比賽之後,佢已經感覺到呢一點,所以冇辦法出場。我唔知道情況有幾嚴重,只能一個禮拜又一個禮拜,一日又一日咁去睇睇吓咩情況。」

哥迪奧拿講到咁灰,皆因骨應力性反應好飄忽,4至6星期、10至12星期亦話唔埋;哥帥喺賽後記招話希望世界冠軍球會盃,就係夏蘭特復出之日,但喺奇雲迪布尼未有確實歸期下,仲要冇埋夏蘭特,對曼城爭取衞冕,無疑係沉重打擊。

曼城今仗以祖利安艾華利斯,代替夏蘭特打單箭頭,雖然照常佔優,但真正威脅唔大,成隊波依然沉沉哋,完半場前更落後0:1。全靠平均質素,62及65分鐘,由貝拿度施華、基亞利殊閃電建功反勝,目前33分排第4,少榜首利物浦4分。

同時間開波嘅賽事,富咸真係發咗癲,繼周中5:0大炒諾定咸森林,再以同樣比數狂數韋斯咸,火力全開。

最值得表揚嘅係愛華頓,主場2:0贏車路士,取得3連勝。自從被英超聯賽會扣10分後,拖肥糖大打爭氣波,連攞9分,升上第17位,暫時脫離降班區,夠晒勵志。