【英超】夏蘭特大四喜 曼城5:1炒狼隊 哥帥話唔追得失球;殺神起番Q 最後3戰好易執?

周日凌晨英超,又係佢嘅世界!曼城中鋒夏蘭特食大四喜,主場5:1大炒狼隊,繼續緊貼阿仙奴,打少一場、落後1分。曼城領隊哥迪奧拿賽後話得失球差冇可能追到阿仙奴,只能靠積分壓過對方奪冠。

曼城全取3分後,35仗82分排次席,以1分落後36戰得83分嘅阿仙奴。只要最後3場全勝,佢哋將成為史無前例嘅英超4連冠。如果最後兩軍同分,將以得失球差分勝負,阿仙奴目前得失球差為60球,曼城54球。

曼城領隊哥迪奧拿賽後直言:「得失球差真係追唔到阿仙奴,所以我哋只能喺積分上反超。阿仙奴太出色,最後3戰,我哋要攞足9分先得,先贏前2場,到第3場,我哋壓力細啲,就可以掌握自己命運。」

阿仙奴剩低兩場,先作客曼聯,15號煞科日主場鬥愛華頓。曼城跟住作客富咸,再作客熱刺,最後主場對韋斯咸。

今仗開賽12分鐘,曼城獲得12碼,夏蘭特主射得手先開紀錄。35分鐘,夏蘭特接應傳中,跳到超高頂入成2:0。完半場前,夏蘭特博到12碼並親自操刀,曼城半場領先3:0。呢位挪威殺神,英超生涯第2次上半場戴帽,亦係英超史上第3位能達成呢個紀錄嘅球員。

53分鐘,曼城門將艾達臣摩拉斯出迎失誤,被狼隊黃喜燦射入,追成1:3。但1分鐘後,夏蘭特接應長傳,殺入禁區射入,完成大四喜。完場前,後備祖利安艾華利斯都入番球,曼城大勝5:1。