英超曼聯又輸一場！近期黑過墨斗嘅紅魔鬼，周六英超主場再以1:3輸畀白禮頓，今季重金來投嘅門將奧拿拿，5場聯賽合共失咗10球，以呢條防線嘅水準，曼聯下仗喺歐聯作客拜仁，真係堅牙煙。
曼聯今場有射手海倫登場，除咗呢位丹麥前鋒，新左閘域基朗、中場老臣子麥湯文尼同樣係今季首次正選上陣，前線仍然有般奴、拉舒福特，大家最關心嘅中堅位，係連迪洛夫拍利辛度。
至於白禮頓就大變陣，同上仗相比有6個調動，韋碧克重返正選倒戈，取代有輕傷嘅艾雲費格遜，矚目新兵安素法迪先列後備，而三笘薰則繼續正選。
唔講唔知，未計今仗，白禮頓近3次對曼聯全勝，今場繼續做剋星，20分鐘，阿迪加右路傳中，韋碧克近門射破前東家，白禮頓話咁快領先1:0。曼聯積極反撲，可惜去到40分鐘，福仔突破傳中畀海倫撞入，但被VAR判定底線出界在先，紅魔半場落後一球，未能喺三笘薰面前複製日本奇蹟。
換邊後曼聯都係冇乜貨賣，53分鐘，林迪同三笘薰配合一輪後畀個波哥斯射入，白禮頓領先兩粒。71分鐘，白禮頓由祖奧柏度射成3:0，已經宣判曼聯死刑，小將美治比喺禁區外轟個靚波，叫做幫球隊喺主場破蛋，唔使太肉酸。曼聯連輸兩場1:3，開季5戰2勝3負得6分，而白禮頓就4勝1負，累積12分。
同時，曼聯今次係喺奧脫福輸波，亦令佢哋由上年10月保持至今嘅31場主場不敗（27勝4和）紀錄斷纜。至於白禮頓就威威咯，近4次聯賽對曼聯全勝，成為紅魔鬼殺手。
