英國首相卓慧思閃電辭職，謝拉特跟隨步伐，成為下一位冇得撈嘅英國名人！周五凌晨英超快車，阿士東維拉作客0:3不敵富咸，仲要係輸得惡睇嗰隻，賽後謝拉特受訪話堅持唔會放棄，但冇幾耐維拉就發聲明，即時宣佈炒謝拉特魷！
未對富咸前，已有消息話維拉獲班主注資，準備定賠償金畀謝拉特，並隨即接觸普捷天奴，搵佢做新領隊。維拉整體表現亦真係幾差，進攻乏力、非常沉悶、缺乏生氣。
即如今仗，維拉攻守都冇瓣掂，畀富咸吊起嚟打，3球已經輸得少。富咸一開波已佔盡優勢，攻門極具威脅，維拉門將達米安馬天尼斯屢救險球，中堅泰朗明斯救空門，到36分鐘終於頂唔順，夏里遜禁區邊勁射破網，富咸上半場領先1:0。
富咸贏埋今場，只落後利物浦1分排第9位，成績咁好，「米神」阿歷山大米祖域不停入波，當然最出眾；仲有已經34歲前車路士中場韋利安，依然弗到爆，玩謝維拉防線。
除咗捱打，中場杜格拉斯雷斯62分鐘被逐，令維拉雪上加霜。「米神」68分鐘憑12碼，取得個人今季第9個英超入球，加埋泰朗明斯完場前擺烏龍，富咸大勝3:0。
維拉近4仗2和2負，11戰只得9分，排第17位，深陷降班危機。當輸到0:2時，看台上更有維拉球迷大叫：我哋要炒謝拉特！
上季中謝拉特由格拉斯哥流浪轉會後，初期表現唔錯，維拉球迷視佢為救世主，非常擁戴；但戰績最現實，教唔掂被炒亦無計。
同晚李斯特城主場2:0挫列斯聯，得到今季第2場勝仗，11戰8分升上第19位，領先包尾嘅諾定咸森林2分。
