攻守都咁廢！曼聯進入坦哈格時代，首場英超即瀨嘢，喺主場1:2輸畀白禮頓。C朗下半場後備入替救駕，你估次次都有神跡咩！
坦哈格人生首場英超，就喺奧脫福球場舉行。經過莫耶斯、尹戈爾、摩連奴、蘇斯克查以及短期頂檔嘅蘭歷克，坦白講，唔少曼迷已看破世情，對新領隊只抱觀望態度，事實上，佢哋係啱嘅。
開鑼戰，由於聲稱C朗未有比賽狀態，馬迪爾受傷，坦哈格擺無鋒陣，艾歷臣推最前，側邊有拉舒福特同辛祖，般奴後上支援。擺明唔強攻，但走位配合亦冇料到，攻力欠奉。
唔入波都算，最大鑊仍然係防線，由一開波已經震騰騰，麥佳亞、達洛治依然發緊夢，新加盟中堅利辛度馬天尼斯，初來報到，都唔知自己要點做，勞基梳爾同一對防中費特、麥湯米尼亦得個跑字。
對住豆腐防線，令敢於壓迫搶攻嘅白禮頓，有好多埋門機會；前曼聯前鋒韋碧克不斷竄擾，製造空位，造就隊友柏斯高哥斯於30及39分鐘射成2:0。
半場完，奧脱福球場噓聲響起。想改變敗局，只能靠嗰個季前想轉會、又話冇比賽狀態嘅人。C朗52分鐘後備上陣，入替費特。打少個防中，盡地一煲。
C朗一出，進攻有重心，形勢好番啲，加上白禮頓減少壓迫進攻，縮後防守，曼聯形成圍攻之勢，終於喺68分鐘藉角球混戰，迫到對手擺烏龍，追成較接近紀錄。
之後曼聯攻勢未見有好大威脅，仍然各自為戰，欠缺進攻模式，只靠兩側傳中搏亂，令白禮頓越守越穩，最終客軍贏2:1。
坦克出師不利，輸一場事少，但攻守都有大量問題要解決。無鋒陣死得，福仔、辛祖完全唔可靠，點都要有C朗或馬迪爾。最大鑊仲係後防死症，麥麥送繼續出事……下周六作客啱啱以2比2逼和李城嘅賓福特，跟住仲要砌利物浦，坦克可以點搞？
