曼聯屋漏偏逢連夜雨！尋晚「紅魔鬼」作客阿仙奴臨天光輸1比3，主力中堅利辛度馬天尼斯又加入十字軍行列，咁都未算，賽後仲爆出辛祖同坦哈格隔空罵戰，將帥不和浮面！
曼聯輸完波之後，主帥坦哈格受訪即大肆批評球證，並指出裁判團隊今場有3大錯誤，包括加拿祖冇越位、海倫應該有12碼、懷斯入波前伊雲斯被侵犯，入球應作廢，呢啲指控成唔成立，相信你知我知單眼佬都知。
不過咁都未算爆，由於曼聯大軍名單冇麥湯文尼同查頓辛祖，反而有兩位小將候命，坦哈格賽後亦被要求解說一下：「麥湯文尼有病在身，至於查頓辛祖，佢冇入選係因為佢喺操練嘅表現，未能達到曼聯嘅水平。」簡單講，即係坦克覺得辛祖操練態度唔認真。
查頓辛祖睇到坦克講嘅嘢後，隨即喺Twitter 反擊：「唔好相信你睇到嘅嘢（坦克訪問）！我唔會任由人哋講大話（屈我），我今個禮拜操練認真，表現好好。我相信呢件事背後有其他原因，我唔會深究，我已經做咗代罪羔羊好長時間，根本就唔公平！」
「我想做嘅，就係笑住踢波，為球隊作出貢獻。我尊重教練團隊做嘅所有決定，我同一班好出色嘅隊友一齊比賽，我好感恩，我知道每個禮拜都係一個新挑戰。無論如何，我都會繼續為曼聯而戰！」
事實上，曼聯上季收購坦克親兵安東尼之後，辛祖嘅上陣機會已經大減，加上表現經常令人失望，今季頭3場聯賽都只係後備入替，早已被邊緣化。
再者，坦哈格入主曼聯後，先後踢走C朗、迪基亞同褫奪麥佳亞隊長資格，出晒名手段狠辣，如今辛祖公然作出反抗，相信嚟緊佢喺曼聯都冇乜運行，執定包袱冬窗搵下一間球會都得喇。
