紐卡素新季唔知行咩衰運，無論抽啲咩籤都係下下籤，聯賽盃賽會仲啱啱證實，喺抽籤過程中出錯，令紐卡素無啦啦要對曼城，慘情！
紐卡素喺英超除開鑼戰對阿士東維拉外，之後接連鬥曼城、利物浦同白禮頓，難得踢歐聯，卻又被抽入死亡之組，對手分別係巴黎聖日耳門、多蒙特同AC米蘭，而日前聯賽盃晉級後，第三圈就抽中硬撼曼城，黑仔到爆。
但咁都未算最黑，最黑係賽會走出嚟話畀你知過程出錯，但Sorry囉還Sorry囉，賽會認錯嘅同時，亦強調唔會重抽嘅！
話說聯賽盃抽籤有電視直播，有眼利嘅觀眾發現，每一隊波係跟英文字母順序嚟做編號，但諾域治(NORWICH)係「19號」，反而紐卡素(NEWCASTLE)變咗「20號」，NE係應該先過NO，即係話，佢哋兩隊個編號掉轉咗。
如果冇出錯，紐卡素係原本嘅「19號波」的話，第3圈對手會係富咸，依家「20號波」，對手就變咗曼城。
賽會發言人亦都證實真有其事：「係，我哋今次呢個編排，冇完全根晒字母順序，不過坦白講，抽籤係唔需要跟足安排嘅，反正都係咁抽，並無影響抽嗰陣嘅公平性，所以我哋唔會再抽過籤喇。」
