和氣生財！周六英超早場，利物浦主場0:0賽和車路士。一億歐元新星梅迪克首度登場，幾乎為車仔入波，而且盤扭、控波都似模似樣，絕對有望成為及時雨。
和和果果，對成績欠佳、備受壓力、同病相憐嘅兩隊而言，未嘗唔係一個好戰果，應該可以接受，起碼唔會衰得更徹底。依家雙方都係29分，利物浦藉較佳得失球差排第8，車路士第10。
兩邊都多傷兵，利物浦繼續冇VVD、法明奴等，車路士亦只能出夏維斯打單箭頭，美臣蒙特、薛耶治支援佢。
場波真係唔輸得，兩隊都相對保守，真正危險攻門唔多，夏維斯開波3分鐘曾經入波，但越位在先。利物浦前鋒方面，加普依然冇咩料到，沙拿連續3場聯賽射門零中龍，令人失望透頂，達雲紐尼斯後備出場，亦難寄予厚望。
全場唯一焦點，由55分鐘開始出現，身價一億歐元、由烏克蘭球會薩克達來投嘅23歲進攻中場梅迪克，首度亮相英超。梅迪克曾兩度騷quali，一球殺入禁區，精彩扣過兩名利物浦後衞，可惜最後射中網側。
另一球佢發揮速度，中場左路高速疾走，令占士米拿要出超技術，先至將佢整低。呢兩球都顯示梅迪克有一定份量，英超地標戰觀感唔錯，講波嘅加利尼維爾更誇張，話只係睇咗10分鐘，已經覺得梅迪克係一班質素。
今個冬季轉會窗，車路士瘋狂買人，已經用咗2億1000萬歐元，而且都係優質年輕球員，大換血勢在必行，係睇吓換唔換埋領隊樸達。短期嚟講，有咗梅迪克，加埋前鋒借將祖奧菲歷斯坐完波監後，車路士下半季成績或會有好轉機會。
