【英超】吞愛華頓兩蛋;高普道歉 認爭冠機會近乎零!兩大因素導致利物浦甩拖

高普承認玩完!利物浦周三英超作客0:2不敵愛華頓,近3場聯賽兩敗,雖然仍排次席,但落後榜首阿仙奴3分,並打多2場下只領先第3位曼城1分,今季只剩4場,領隊高普賽後話,唯有兩支爭冠對手同時失準先有希望,機會不大,並為今場差勁表現向球迷道歉。

今場一開波,利物浦已經響起警號,愛華頓中鋒卡維特利雲喺開賽後6分鐘博得12碼,好彩越位在先,利物浦暫時逃過一劫。不過要嚟嘅始終會嚟,27分鐘,利物浦禁區內一輪混戰,後衛解圍亂晒籠,最終班夫韋迪門前射入,為愛華頓先開紀錄。

之後利物浦狂攻,但今場三叉㦸並唔煞食,沙拿狀態唔掂、起唔到Q,路易斯戴亞斯、達雲紐尼斯先後有機會,可惜又過唔到愛華頓門將比克福特,今季已經有好多場都係咁,經常好多射門,但轉化唔到為入球。

利物浦逼搶戰術出名消耗體力,踏入季尾,眾將明顯謝謝地,下半場攻勢力度反而比換邊前弱,最有威脅係戴亞斯曾經射中楣。運都輸埋,更被拖肥喺58分鐘拉開比數,卡維特利雲頂入角球,最終愛華頓2:0擊敗利物浦。

連同今仗,利物浦近3場聯賽只得1勝2負,最後直路先嚟腳軟,教埋今季就走嘅高普,睇嚟只有聯賽盃做告別禮物,高普賽後直言:「依家要阿仙奴及曼城同時失準,我哋先有爭冠希望。但從歷史嚟睇,呢個階段,佢哋係唔會輕易失分……我哋對今場結果好失望,創造咗唔少機會,但入唔到波,我只能為今日嘅比賽向大家道歉。」