你話車路士廢？利物浦都唔好得幾多，周六英超又輪波，作客對白禮頓，慘吞3隻光蛋，而且踢落一無是處，無論埋門、控球全部輸晒畀白禮頓，唔輸多兩球已經好彩。
白禮頓全取3分之後，積分榜巳超越利物浦，大家都踢咗18場，白禮頓30分排第7位，利物浦28分位居第9。
贏得極有說服力，白禮頓展示強大攻力，全場圍毆紅軍，目前已合共攻入35球，英超第4多，僅少過阿仙奴、曼城同熱刺。
三笘薰再做正選，左路威脅超大，玩到阿歷山大阿諾特頭暈，同利物浦舊將拉爾拉拿、蘇利馬治，強力支援中鋒艾雲費格遜，加埋世界盃冠軍成員阿歷斯麥阿里士打，回歸擔任防中，取得壓倒性優勢。
利物浦球員冇厘神氣，表現同對手差天共地，沙拿已經態沉，同新加盟嘅加普亦少配合，兩個各自各搵食，阿歷士張伯倫亦冇料到，攻力極度不足。
中鋒達雲紐尼斯加入傷兵行列，中堅雲迪積克亦養傷當中，冇咗VVD，利物浦班後衛好似唔識踢波咁款，上半場險象橫生，唔失波夠運。
下半場只有2分鐘，祖爾麥迪比交失波，想唔死都唔得，三笘薰交蘇利馬治近門撞入。53分鐘蘇利馬治再射入世界波，白禮頓領先至2:0。
利物浦冇得還拖，繼續被攻到氣咳，83分鐘輸第3球更核突，白禮頓界外球掟入禁區，韋碧克球王上身，先挑過祖高美斯，再輕易近門射入，成班紅軍後衞一係失位，一係掛住睇波，與雪糕筒無異。
聯賽繼輸畀賓福特後，再一次完敗予一支中型班…目前利物浦領先第10位嘅車路士3分，兩隊將會喺下周六英超早場碰頭，高普同樸達，邊位可以攬住個水泡呢？
