'

【英超】同光頭佬擘面!曼城踢走簡些路 拜仁執到寶?

冬季轉會窗關閉前夕,出現震撼彈,世界級「帶刀侍衛」祖奧簡些路,同領隊哥迪奧拿反面,已被曼城清洗,外借至拜仁慕尼黑,而且仲有6100萬鎊買斷條款。

祖奧簡些路近年坐穩曼城主力位置,左右閘皆宜,亦可以打中場,出擊及用波能力,更加係頂級卡士,上季英超就有7次助攻。但嚟到今季,簡些路狀態操極唔起,世界盃期間,去到淘汰賽階段亦已非葡萄牙必然正選,世界盃後,哥迪奧拿更冷落呢位葡萄牙國腳,近10仗只得3次正選。

簡些路一直頂住度氣,上仗足總盃對阿仙奴前,佢知道自己又做後備之後,喺訓練場即時搵哥迪奧拿理論,雙方激烈爭吵,之後祖奧簡些路提出離隊要求。

領隊威嚴不容侵犯,曼城高層就決定畀祖奧簡些路走人,仲好快手同拜仁慕尼黑達成協議。哥迪奧拿其實好定檔,皆因佢近期用尼敦阿基串演左閘,亦試過3中堅陣式,基gor表現非常出色,而右閘又有新人列高路易斯冒起,手上大把貨,簡些路既然頂撞博走人,當然求仁得仁。

當然,祖奧簡些路始終有卡士,只要回復正常狀態,多功能好使好用,特別助攻能力超強,今次離隊,點都對曼城爭逐今季英超及歐聯,構成一定程度影響。

至於拜仁喺德甲連和3場,目前僅領先次席柏林聯1分,突然有筍貨來投,都算係及時雨。祖奧簡些路今季先以借將身分効力,合約包含買斷條款,拜仁可以喺球季結束後,以6100萬鎊正式買斷。